TSINILAS

Napodpod na intawon baratohon kong tsinelas
Wa na kaagwanta sa tiil kong way hugas
Kay sa manikyurista di maka afford magpalimpyo
Unsaon buslot ang bulsa kay dugay pa ang sweldo

Walay mahimo niining kabuntagon
Dinhi sa pultahan nanghinoktok lang intawon
Kung unsaon pagpalambo akong kaugmaon
Wa ko nahibalo ang tsinilas pangutan-on

Kaniadto sa gamay pa akong mahinumdoman
Uso nga tsinilas mga dragon ug spartan
Naa sab mahalon brown nga guma dunay magnet
Sa tamakanan sa tikod magnet gilubong gipapilit

Makalingaw ang tsinilas sa bata pa ko
Adlaw ting-ulan himoon ug barko-barko
Didto sa kanal among ipalutaw ipaanod
Kaming mga bata sa tsinilas magsunod sunod

Pero mas lingaw gyud ang tumba lata
Tsinilas gamiton aron kini matumba
Pero unsaon hinay man ko mudagan
Intawon ma-igot palagoton sa kabataan

Sa among lugar pwerti gyud ka lapokon
Bisag tsinilas nga ba-o mabugto ra gihapon
Busa sa lapok magtiniil tsinelas bitbiton
Pag abot sa karsada mao pa kini sul-ubon

Apan mag ignay kay daghan ug bildo
Daghan sab ug lansang nga tayaon kaayo
Kung di ka mag-igmat malagmit matunok ka
Siguradong masamad ug buslot imong lapa-lapa

Kung ikaw natunok kay wa nag tsinilas
Ayaw pagsaba tambali lang kini'g bayabas
Kung ikaw muuli nga nga kiang-kiang
Masakpan sa nanay basin pa makibitan

Kung bag-o ang tsinilas kinahanglan ampingan
Kay basin maib-gan sa mga batang silingan
Pagka gabii ayaw ibilin sa pultahan
Kay pagkabuntag sigurado gyud mawagtang

Ang bag-ong tsinilas palangga hinugasan
Pero kung podpod na kini pinasagdan
Kung kini mabugto ayohon gyud ug hiktan
Kay wala pay budget ang pobreng ginikanan

By : Jun Abines