CAMPO, BOW!

Ako nakapuyo didto sa Campo
Puy-anan sa mga "dagkong tae" sa kompanya kaniadto
Pwerti ka hilom ug mingaw kaayo
Tingog sa kalaw maoy mabati kada udto

Dagko ang balay murag pang amerkano
Libre kurente, tubig apil sab telepono
Kinural ang palibot binantayan sa daghang iro
Kay daghan daw white lady kapre ug di ingon nato

Matag kaadlawon daghan mag suroy didto ug pandesal
Ilang baligyaan ang kampo apil sab ang hospital
Deretso sa duplex hantod sa tennis court ug sa gym
Monaug dayon didto sa bungtod sa wash truck ang ending

Matag hapon ug gabii daghan kabataan magpanon
Tanan sila malipayon kay sine sa gym ila tan-awon
Mga batang bulingit ug sip-onon magbaktas intawon
Gikan pa sa baryo, dyso, dylm, christine ug tuyoon

Mga balay sa kampo maoy symbol of success kaniadto
Dunay TV, bentelador, cassete, kutson, freezer ug dagko nga puno
Mga CR American standard ang banyo ug kusina naka tiles
Mao kadto ang gitawag nila nga American life style

Pero ang di nako hikalimtan mao ang ice cream
Kalipay sa mga kabataan kung mabati ang "kiling-kiling"
Didto sa kampo daghan sab ug mga prutas
Tambis, boungon, avocado macopa, santol ug bayabas

Matag bakasyon flores de mayo amo sab apilan
Mga bulak ibutang sa butilya ug ihalad sa simbahan
Daghan gyud maglagot nga mga silingan
Kay ilang nindot nga bulak gikawat sa kabataan

Matag gabii mao among kalipay ang TV
Di pwede molaag kay ang gate naka sira pirmi
Usahay sugoon mag vale sa tindahan nila Magas
Syempre apil pirmi ang coke ug paboritong patatas. Bow!

( By: Jun Abines)