GUTOM, Bow!

       Giantos ko suwaw ug init sa adlaw
Udtong totok na gyud pwerti na ka uhaw
Gigutom nagbaktas ug pila ka kilometro
Nanghinaot naay maabtan sa balay nga paniudto

Tiyan kong way sulod sige nagdagook
Matag recess sa eskwelahan sige na lang manlad-ok
Kay saging ug kamote mao ra man pamahaw
Dali rang gutomon ang kabusog taphaw

Bugtong kong Sapatos guba ug buslot na
Lunes hangtod byernes baktason tulay sa kantina
Nagpuyo sa st. Christine nag hayskol didto sa madre
Naglaum nga edukaskon maoy sulbad pagka pobre

Mohilak sa hilom sa tumang kagutom
Upat katuig sa hayshol kinahanglan gyud humanon
Way notbok, way pradyek wala sab asayment
Bisan kasab-an sa titser di gyud mo absent

Kada Sabado manglampas sa umahan
Ug sa adlawng domingo manginhas sa hunasan
Saging Kamote'g kalibre maoy giantosan
Parisan kinhason ug kasag nga sud-an

Kada adlaw gigutom panagsa ra mabusog
Tiyan nagkurog ug hawoy ang tuhod 
Apan sa kalisdanan di ko moluhod
Padayon maningkamot aron mobarog

Nindot handomon mga kagahapon
Taliwala sa kalisdanan ug sa kawad-on
Kalisod ug kagutom maoy nagpalig-on
Walay problema nga di kaya sulbaron. Bow!

(By: Jun Abines)