BARANGAY, Bow!

       Uso ang Barangay sa among baryo
Matag balay sa silingan kami mag rosaryo
Bitbit ang estandarte matag gabii
Ang kugihan moapil mabusug gyud pirmi

Kanunay magpanun mga batang way ligo
Patatas ug koks mao ray ilang tuyo
Latin ang pag-ampo dili uso iningles
Importante makatubag ka ug "Ora Pronobes"

Imo tsinilas kinahanglan gyud ibilin
Didto sa hagdanan ipahimutang sa daplin
Ayaw paghilak kung tsinilas mo mawala
Kay gitagoan ra kana sa maldito nga bata

Ayaw gyud kalimot pagdalag kandila
Kay ngitngit ang dalan basin ka madagma
Maghinay ug lakaw maglikay sa lapok
Kay kung ikaw ma slayd lubot mo lagupok

Pag-ampo sa barangay pwerti gyud kadugay
Mga latin nga pulong ibalik-balik kanunay
Mga batang gagmay sa sala magyaka
Apil mga dalaga'g ulitawo sa kilid magduka

Usahay ang Barangay pwerti gyud kamingaw
Kay mga kabataan tua sa bayli nalingaw
Pero motunga sila kung naay paboritong painit
Labi na ang gi-handa biko ug binignit. Bow!

(By : Jun Abines)