Di lalim kung gipanganak kita nga maot
Ato lang nanay ug pamilya kanimo mahimoot
Sa gagmay'ng mga bata kita daug-daugon
"Maot ug Nawong" kita ilang sungugon
Bisan unsaon ug pahiyom maot lang gihapon
Bisan unsay sul-oton di gyud mausab ang nawong
Ambot unsay sala gisilotan sa kapalaran
Pislat kong ilong murag sa pison giligsan
Gugma kong putli wa gidawat ni Inday
Sa maot kong nawong siya nakatamay
Busa ako nipahilayo nang langyaw
Didto sa halayong dapit nag-antos sa kamingaw
Naningkamot nagkugi sa dugay'ng panahon
Gi swerte ug daghang kwarta akong natigom
Nibayad ug dako misulod sa klinik
Nawong ko nausab mura na'g si Brad Pitt
Daghan natingala sa akong pag-uli
Mga gwapang babaye sa ako sige'g lingi
Si Inday mitotok wa kanako makaila
Sa lalaking kaniadto pa kaniya nahigugma
Miduol kang Inday ug ako nagpaila
Mipahiyom siya'g hilaw iyang nawong namula
Di siya makatuo pwerti na nakong gwapoha
Dako ug balay ug naka wheels pa
Wa gyud ko matinga si Inday nausab
Dagko na ug pahiyom tam-is na motagad
Apan gugma ko kaniya dugay nang nahanaw
Kay sa kagwapo ug kwarta lang siya nitan-aw
Didto nidoul ang silingan kong si Nening
Maot siya'g nawong ug kanako dugay na nagpaduding
Apan ako nasayod putli iyang kasing-kasing
Siya ang himoon kong bride sa akong grand wedding! Bow!
(By:Jun Abines)
No comments:
Post a Comment