ANG LIANGA BAY, BOW!

       Yuta sa saad ang akong natawhan
Kinabag-an nga lasang atbang sa pasipik osyan
Mga dagko nga suba mga gagmay nga sapa
Lapad nga hunasan ug bato nga kapuloan

Wala pay karsada ug pantalan kaniadto
Hangtod niabot dinhi mga amerikano
Gitugtan magnegosyo sa atong gobyerno
Aron mang harbes sa mga dagkong troso

Dekada singkwenta kompanya gitukod
Gatosan ka mga empleyado ila gipasulod
Naghimo ug erport ug ubang pasilidad
Sa mata sa lumad mura na kinig syudad

Dekada saysenta kusog na ang operasyon
Gipamonoan sa Amerkanong protestante ang relihiyon
Mga empleyado'g pamilya lunsay nagmalipayon 
Ubos sa pagdumala sa mag-asawang Jacobson

Dekada setenta nisulod na si Marcos
Nag sugod sab kadaghan mga "way sapatos"
Panag-iya sa kompaya gusto nang ipa-embargo
Pinaagi sa crony nga ginganlag Sabido

Dekada otsenta pwerti nang gubota
Mga Amerkano nahadlok ug namakwit na
Sweldo sa mga tawo wa na gyuy klaro
Sige pa gyud gyera NPA ug Sundalo

Dekada nobenta didto natapos
Kagubot ug kalisod di na gyud maantos
Kompaya ug pasilidad kalit lang nahanaw
Ang uban nakapahimolos kadaghanan nitiyabaw

Lianga Bay Logging Company Inc. Maoy pangalan
Dunay pending nga kaso didto sa Sandiganbayan
Lisod sabton kung unsa pay ilang giawayan
Basin duna pay pundo sa banko nga gitagoan

Kumpanyang Lianga Bay lisod hikalimtan
Hangtod karon buhi kini sa panumduman
Way laing mahimo kundi pasalamatan
Ang tam-is nga kagahapon bisan sa balak man lamang. Bow!

(By: Jun Abines)