Kami ang tinood nga manag amigo
Nagsugod ug kuyog sa gagmay pa kaayo
Kami kuno ang mga batang maldito
Kay pwerti ka laagan bisan asa moadto
Didto sa dagat kami manginhas
Sa kalibunan manguha kami ug bayabas
Sa suba didto kami magpabugnaw
Ma ligo entero adlaw sa tubig mag tampisaw
Kung way lingaw sa karsada kami magdula
Mag ginukdanay hantod mohalhal ang dila
Kung di mag kasinabot diretso mag away
Bahala mga bukol ang nawong sa sinumbagay
Sa mga batang babaye kami manungog
Apan ang tinood mobati na kami'g kaibog
Pero di gyud namo ipahibalo sa barkada
Kay di maayo nga sungogon ka nila
Dungan sab kami tanan magpa tuli
Aron kuno motul-id ang agas sa among ihi
Pangandoy namo tanan ang mo datu
Aron hatagan sa tanan ang amigo nga mangayo
Tam-is ang kinabuhi walay problema
Dula, kaon ug tulog lang ang gihuna-huna
Kay ugma damlag kami modako na
Kami na sab mag sud-ong sa pamilya.
By : Jun Abines
No comments:
Post a Comment