KAGABHION

       Tingog sa palaka mao ray nabati
Samtang mga bituon sa panganod nagpahipi
Paak sa lamok ako lang giantos
Sa gabiing matugnaw ania nangiyudpos.

Text sa hinigugma wa pa gyud niabot
Signal sa celfone tinood makasapot
Tiyan nagdagook nireklamo kay gigutom
Apan, Kasing-kasing masulob-on walay gana'g kaon.

Nagsugod ang tanan tungod aning facebook
Sa maanyag mong "selfie" ug aping mong lamorok
Wala pay usa ka buwan imo kong "gisugot"
Sa sige nato chat allowance ko nahurot

Asa na man ang imong mga panaad
Sa mas kwartahan nga lalaki sige kag kuyog laag
Mga malipayon ninyong picture imo kong pasuyaon
Dughan ko nadugmok ug naghilak sa hilom

Putli kong gugma daw gikumot-kumot
Dili makatulog ginhawaan naghuot
Wa ko handuma usa ikaw ka maluibon
Wa kay kasing-kasing, atay ug batikulon.

Busa ania ako miuli sa Diatagon
Aron tanan kasakit kalimtan sa dayon
Maayo gani si Inday, kanhi kung trato dalaga gihapon
Nagkita mi ganina tam-is iyang pahiyom

Goodbye facebook, goodbye selfie
Kay mag "date" mi ugma ni Inday didto sa "koswi"
Kung kami magkadayon sa dalan sa kaminyoon
Invited mong tanan sa engrandeng selebrasyon. Bow!
(By: Jun Abines)