KAUSABAN, BOW!

       Ang tulay nahugno Kantina nasunog
Dakong kahoy magkuno maoy padayon nagbarog
Motorpool sa ibabaw dugay nang nahanaw
Way andar sa makina pwerti gyud kamingaw

Veneer plant napapas opisina nawagtang
Puthaw ug materyales ila gipatimbang
Ospital nagpabilin kay dunay nag amping
Apil gym sa campo uban sa nabilin

Karsadang libaong sementado na karon
Lapok ug abog parti nalang sa kagahapon
Lagyong lugar kaniadto sayon lang baktason
Karon ang doul nga tiangehan sa motor pagasakyon

Batang pobre kaniadto niuli nga nag awto
Nanglangyaw nagmalamposon usa na ka edukado
Naglibog natingala sa iyang nasaksihan
Iyang yutang natawhan halos di na mailhan

Mga silingan nanglakaw katigulangan nipanaw
Balay nga gubaon naghari ang kamingaw
Palibot daw nigamay daghan kaayog sagbot
Kaguol ang gibati dughan naghuot

Dili kini ang Diatagon nga iyang nahimumduman
Bibo nga palibot ug daghan kalingawan
Mga tawo sa palibot wa siyay mailhan
Wa gyud mikidhat o mipahiyom man lang

Karaang silingan klasmet ug barkada
Mao na lang intawn ang nakaila kaniya
Nagsugba nagkilaw kagahapon gihisgotan
Mga kabuang ug uyab-uyab maoy gisumsuman

Haw-ang niyang pagbati iyang gipahibalo
Dili ni mao ang Diatagon kaniadto
Apan alang kanila palibot way kausaban
Siya nga nanglangyaw maoy di na mailhan, bow!

(By: Jun Abines)