Ania ako nagpahayahay
Ilawom ning punoan sa dakong talisay
Naglulingkoray sa batong bantilis
Aron mga kagul-anan sa dughan mahilis
Makalagot gyud kining kinabuhi
Kalipay ug paglaum hinay nga nidahili
Buslot ang bulsa way sulod ang pitaka
Wa sab klaro trabaho ug pangwarta
Ania sa nindot ug mamingaw nga baybayon
Samtang ang adlaw nagdumili pagpahiyom
Baga ang panganod daw kilom-kilom
Apan sayo pa man unta sa kabuntagon
Tubig sa dagat gusto kong matamak
Apan ang tumang katugnaw sa panit mamaak
Wala pay kaligo baga ang buling sa liog
Bato sa babayon nindot himoon ug lugod
Akong kinabuhi sama ning lubi sa baybayon
Balod sa problema hinay-hinay akong tumbahon
Apan kining tanan dili ko angay'ng problemahon
Kay tanan buhing butang adunay kamatayon
Busa sugdan ko ang adlaw nga nag pahiyom
Balod ug unos sa kinabuhi akong atubangon
Bahala'g nagkalisod ako mopadayon
Kay samtang may kinabuhi adunay paglaum. Bow!
(By: Jun Abines
No comments:
Post a Comment