BATANG ST. CHRISTINE

Ako usa ka batang taga st. Christine
Troso sa logpond ako abtik mag maiktin-iktin
Manguha mi didto ug bughaon nga ritaso sa troso
Usahay mag sideline sab mi manguha'g liboo

Planta sa Veneer ug Motorpool amo kining sudlon
Sa estrikto nga sikyo kami kanunay sagdahon
Luyo sa mess hall amo kining ransakon
Mga karaang payroll cards ug papeles among kuhaon

May dakong punuan sa manga didto sa buntod
Among katkaton ug kaonon gagmay'ng bunga bisan aplod
Didto sa bukid manguhag lubi ug hinog nga pinya
Sa manindahay sa eskwelahan didto namo ibaligya

Sarsa ug putos sa sigarilyo kami magtakse
Jolen, lastiko ug teks magdula walay pili
Syatom, bulan-bulan bisan ug ayok-ayokan
Paon-paonan, monkey anabel among dulaan

Kung unsa sine sa campo maoy himoon nga uso
Sundugon maskara ni Lito Lapid ug .45 ni Fernando Poe
Sa kahoy nga pusil kami mag gira-girahan
Usahay bala ang sarsa usahay totho ug luthang

Didto sa dagat sige manginhas ug mamingwit
Dili gyud bation kagutom ug kainit
Didto sa bukid sa kalangaman mamintik
Sa tikling bibang ug sa milo mang lit-ag ug mamitik

Apan di malabwan kabibo sa pasko ug pista
Adunay bayli, amateur ug basketball nga liga
Tanan balay maghikay ug daghan bisita
Kay nagsalig man sa kompanya ug dakong kantina

Lugar nga St. Christine di gyud nako hikalimtan
Uban amigo'g amiga ug mga pinalanggang silingan
Kay dinhi ako nidako ug akong kalipay di matupngan
Dad-on sa panumduman hangtod sa lubnganan. Bow!

By: Jun Abines