PISTA SA ST. CHRISTINE, BOW!

Sugod karon magtipon ko ug kwarta
Kay sa Mayo 31 sa St. Christine ako mamista
Maglukat ko daan ug round trip ticket sa eruplano
Kay barato ra man pamasahe kung dunay promo

Molupad ko gikan Cebu padulong sa Butuan 
Trabaho ug problema kadiyot nga kalimtan
Makighimamat sa mga amigo ug mga silingan
Ug motamak pagbalik sa yutang natawhan

Kinabuhi ko karon daghay kausaban
Puno sa problema ug mga kabilinggan
Busa sa pista sa St. Christine ako maglingaw
Kay sa palibot ug silingan ako gimingaw

Mokaon ko'g litson sa mga higala makig-inom
Mga kagahapon hisgotan ug diyot mga handumon
Kay kinabuhi hamubo dili angay sayangon
Kung asa ko malipay maoy akong himoon

Hilltop, motorpool ug mess hall akong suruyon
Elementary ug high school campus akong duawon
Dad-on ko tablet ug camera kay mag selfie dayon
Ang wala mamista sa facebook akong pailaon

Nahanaw nga planta sa veneer akong susihon
Bag-ong tulay duol sa Cory village akong baktason
Moadto ko sa Causeway ug mohapit sab sa tuyoon
Akong plano Andanan bridge ako sab adtoon

Gubang tulay sa kantina ako sab moadto
Kay kini ang tulay nga pirming tabokan ko kaniadto
Kay way ikabayad kang Masong ug Taner nga bangkero
Aron motabok sa DYLM padulong sa baryo

Mosuroy sab ako didto sa bao-bao
Kay hantod karon wa pa gyud ko ka adto
Kining tanan maoy akong plano
Puhon pag-abot bulan sa Mayo

Kinsa kaha ganahan mokuyog nako mamista
Aron didto sa st. Christine daghan ming turista
Labi na kanhing mga silingan nga nanglangyaw na
Kung daghan ming magkuyog pwerti gyung biboha. Bow!

By: Jun Abines