BATANG SIP-ONON, BOW!

       Ikaw kadto ang batang sip-onon
Among silingan didto sa Tuyoon
Wa kay ilis ug imo nawong bulingit
Sip-on ug kugmo sa aping mo namilit

Ikaw gyud ang sige namo sungogon
Lamorok mong aping lami gyud kibiton
Sa among pagkaon ikaw palawayon
Walay adlaw nilabay nga di ka pahilakon

Tuig nilabay sa wa nako damha
Ikaw nidako karon dalaga na
Nindot ug tindog ug pwerting hamisa
Dako gyud kausaban sa imong itsura

Akong kalagot napulihan'g kahadlok
Basin akong atraso ikaw wa kalimot
Dughan daw moboto sa imong pagtotok
Sige ko'g panlad-ok ug ni ka pamilok

Unsay himoon ako naglibog
Kining gibati nga tumang kaibog
Kanimo nagdamgo ug di makatulog
Way lain paagi kundi maghubog

Batang sip-onon ako pasayloa
Sa akong panan-aw ikaw si Cinderella
Sa inyong balay pwede ba mamisita?
Kanimo ihalad putli kong gugma. Bow! 

(By: Jun Abines)