MAG-UUMA

Ako usa ka yanong nga mag-uuma
Tibook kinabuhi nag tanom lang ug nagguna
Saging, kamote ug bulanghoy ang gitanom
Parisan sad sa mga prutas ug gulayon

Dinhi sa bukid ako nag puyo
Maayong panglawas sa ginoo mao ray gipangayo
Uban sa mga anak ug asawa nagmalipayon
Wala na nangandoy ug mga sakyanan ug mansyon

Igo na kanako makakaon matag adlaw
Yohohoy sa hangin ug awit kalanggaman maoy lingaw
Maoy kalipay nga moabot ang sabado ug dominggo
Aron molugsong sa lungsod moapil sa tabo

Didto sa lungsod pwerti ka bibo
Makapalit kag sardinas, tabako ug bino
Syempre importante sab ang asukar, asin ug posporo
Aron pag balik sa bukid ang kinahanglan kumpleto

Sa baboy ihalas ug usa akong mangayam
Unggoy ug langgam maoy kontra sa umahan
Baksan, Halo ug milo maoy tighurot sa manok
Iro kong si brownie maoy mogukod ug mopaghot

Akong kalipay mao ang karaan kong radyo
Aron makapaminaw sa komedya ni esteban eskudero
Apan pwerti kamahal paliton ang baterya
Aron sa kahaponon malingaw sa mga kanta

Mao kini ang simple kong kinabuhi
Sa mga kahilayan ug bisyo ako nag dumili
Di na kinahanglan nga ako ma milyonaryo
Hingpit nga kalinaw sa kinabuhi dili ko ibaylo. Bow!

By : Jun Abines