TABANOG

Kalipay ko kaniadto magpalupad ug tabanog
Sa kainit sa adlaw way kahadlok mga panit masunog
Didto sa hawan sige ako magdagan-dagan
Mga huyop sa hangin akong gipailin-ilinan

Gamit ang papel nga dyaryo ug tukog sa silhig
Sa nipis nga tanod ni nanay tabanog ko gisalig
Kahinam sa akong kasing-kasing wa gyud milubad
Himoon ko tanan aron tabanog ko molupad

Una kong tabanog dakong kapakyasan
Di mao ang balansi ang desenyo dautan
Mitakilid, mituyok ug dayon misawom
Imbis padulong sa kalangitan, sa yuta mipaingon

Ikaduha kong tabanog nasangit sa poste
Kay pitsido ang lugar sayop akong diskarte
Ikatulo kong tabanog nakalupad gyud intawon
Apan pisi na bugto tabanog ko misawom

Apan wa ako nagpapildi sa mga kalisdanan
Sa pahimo ug tabanog wa gyud ko miundang
Niabot ang panahon sa tabanog ako na eksperto
Daghan koy namauhan nga bisan unsang desenyo

Ang pagpalupad sa tabanog adunay pamaagi
Atubangon gyud ang hangin birahon ang pisi pirmi
Matag huyop sa hangin kini opurtunidad
Bihahon ug tugutan ang pisi aron motaas ang lupad

Salamat akong tabanog sa mga pag tulun-an
Ako nidako nga adunay abilidad ug kinaadman
Ang pag himo sa tabanog usa ka pagsuway
Kinahanglan molupad kini aron kita malipay

Ang atong kinabuhi sama sa tabanog
Mga hangin sa pagsuway sugaton nga dunay kaisug
Pisi sa diskarti ug kakugi angay nga tugotan
Aron molupad pataas padulong sa kalamposan. Bow!

By : Jun Abines

Gamay nga hangyo, kung ikaw na lingaw ug giganahan sa mga balak, 

palihug ug click sa mga Ads ug Pahinumdom nga naa sa kilid.

Dako kini ug tabang kanako nga padayon mag sulat ug mga

balak bisaya. Salamat