KAPALARAN

Didto sa dakong kahoy nga karaan akong gipatik
Ang pangalan sa babaye nga sa akong dughan gipitik
Ginamit ang hait nga tumoy sa kutsilyo
Aron dili kini mapapas ug modugay pag-ayo

Siya ang babayeng unang naibgan ug gimahal
Tungod sa dako kong gugma niinom ako'g bahal
Aron makahulam sa bino ug dugang kaisog
Aron itug-an ang gugma kaniya nga tuhod di mokurog

Apan di gyud matag-an ang mga panahon
Nahuman ang mga katuigan ako kaniya wa maka-ingon
Gugma ug pag dayeg kaniya padayon nga gisekrito
Hangtod sa halayong mga dapit ako niadto

Gibati ko kaniya padayon nga buhi
Akong kasing-kasing siya lang ang gipili
Apan wala ako'y kaisog isulti kaniya ang tanan
Dili siya alang kanako maoy desisyon sa kapalaran. Bow!

By : Jun Abines

Gamay nga hangyo, kung ikaw na lingaw ug giganahan sa mga balak, 

palihug ug click sa mga Ads ug Pahinumdom nga naa sa kilid.

Dako kini ug tabang kanako nga padayon mag sulat ug mga

balak bisaya. Salamat